ಮಾಕ್ವೈರ್ ದ್ವೀಪ

ಸಮುದ್ರಮಟ್ಟದಿಂದ ಅತಿ ಎತ್ತರದಲ್ಲಿರುವ ಇಲ್ಲಿನ ಭೂ ಪ್ರದೇಶ ಮತ್ತು ಬಂಡೆಗಳು ಇಡೀ ವಿಶ್ವದಲ್ಲಿ ಅಪರೂಪವಾದದ್ದು. ಪೆಸಿಫಿಕ್ ಸಾಗರ ನೈರುತ್ಯ ಮೂಲೆಯಲ್ಲಿ ಇರುವ ಈದ್ವೀಪ ಅಂಟಾರ್ಟಿಕಾ ಮತ್ತು ಆಸ್ಟ್ರೇಲಿಯಾಗಳ ನಡುವೆ ಹಂಚಿ ಹೋಗಿದೆ.

1810ರಲ್ಲಿ ಫ್ರೆಡರಿಕ್ ಹ್ಯಾಸಲ್ ಬರೋ ಎಂಬಾತನಿಂದ ಪತ್ತೆಯಾದ ದ್ವೀಪವಿದು. ಸೀಲ್ ಗಳ ಭೇಟೆಗೆ ಹೊರಟಿದ್ದ ಹ್ಯಾಸಲ್ ಗೆ ಈ ದ್ವೀಪ ಕಂಡಿದ್ದೆ ಇದು ಬ್ರಿಟನ್ನಿಗೆ ಸೇರಿದ್ದೆಂದು ಹೇಳಿದ. ನಂತರ ನ್ಯೂ ಸೌತ್ ವೇಲ್ ನ ಗವರ್ನರ್ ಆಗಿದ್ದ ಕರ್ನಲ್ ಲ್ಯಾಂಚ್ಲನ್ ಮ್ಯಾಕ್ವೈರ್ ಹೆಸರಡಿಲಾಯಿತು.
ಭೂಮಿಯ ವಿಕಾಸ, ಇತಿಹಾಸದ ಅನೇಕ ಅಧ್ಯಾಯಗಳನ್ನು ಈ ದ್ವೀಪ ಒದಗಿಸುತ್ತದೆ. ಭೂಖಂಡಗಳ ಅಲೆತ ಸಿದ್ಧಾಂತಗಳಿಗೆ ಪುರಾವೆಗಳು ಇಲ್ಲಿ ಸಿಕ್ಕಿವೆ. ಈ ದ್ವೀಪ ಕಡಲ ಹಕ್ಕಿ ಪೆಂಗ್ವಿನ್‌ಗಳ ಸ್ವರ್ಗವೂ ಹೌದು. ಸಮೀಕ್ಷೆಯೊಂದರ ಪ್ರಕಾರ ಇಲ್ಲಿ ಸುಮಾರು ೮.೫ ಲಕ್ಷ ಜೊತೆ ಪೆಂಗ್ವಿನ್ ಹಕ್ಕಿಗಳೂ ವಾಸವಾಗಿವೆ. ಪೆಂಗ್ವಿನ್ ಗಳ ಸಾಕಣೆ ಇಲ್ಲಿನ ಮುಖ್ಯ ಉದ್ಯಮ.

೧೯೯೭ರಲ್ಲಿ ವಿಶ್ವ ಪರಂಪರೆಯ ತಾಣಗಳ ಪಟ್ಟಿಯಲ್ಲಿ ಮಾಕ್ವೈರ್ ದ್ವೀಪದ ಹೆಸರು ಸೇರಿಸಲಾಯಿತು.

ಪುರ್ನುಲುಲು

ಬೆಣಚುಕಲ್ಲಿನ ದೊಡ್ಡ ರಾಶಿಯೇ ಈ ಉದ್ಯಾನದ ತುಂಬಾ. ಆಸ್ಟ್ರೇಲಿಯಾದ ಪ್ರಮುಖ ಉದ್ಯಾನಗಳ ಪೈಕಿ ಒಂದಾಗಿರುವ ಪುರ್ನುಲುಲು ಉದ್ಯಾನ ೨೦ ಮಿಲಿಯನ್ ವರ್ಷಗಳ ಹಿಂದೆ ಮೈದಾಳಿ ನಿಂತಿದ್ದು. ಸಮುದ್ರ ಮಟ್ಟದಿಂದ 578 ಮೀಟರ್ ಎತ್ತರದಲ್ಲಿ ಶಂಖದಾಕೃತಿಯಲ್ಲಿ ನಿಂತಿರುವ ಇಲ್ಲಿನ ಶಿಲಾ ಗೋಪುರಗಳು ಒಂದು ಕೋನದಲ್ಲಿ ಶಿಲ್ಪ ಕಲಾಕೃತಿಗಳಂತೆ ಕಾಣುತ್ತವೆ. ಇವೇ ಇಲ್ಲಿನ ಸೌಂದರ್ಯವನ್ನು ಹೆಚ್ಚಿಸಿವೆ ಎನ್ನಬಹುದು. ಬೌಗೋಳಿಕವಾಗಿ ವಿಶೇಷವಾಗಿರುವ ಈ ಉದ್ಯಾನ ಜಲಪಾತ, ಝರಿಗಳಿಂದ ಕೂಡಿದ್ದು, ಆಕರ್ಷಣೀಯವಾಗಿದೆ.

ವಿಶ್ವದ ಅತಿ ದೊಡ್ಡ ದ್ವೀಪ ಫ್ರೇಸರ್

ವಿಶ್ವದ ಅತಿ ದೊಡ್ಡ ದ್ವೀಪವಾದ ಫ್ರೇಸರ್ ಆಸ್ಟ್ರೇಲಿಯಾದ ವಿಶೇಷ ಆಕರ್ಷಣೆ. ೧೨೦ಕಿ.ಮಿ.ಗೂ ಹೆಚ್ಚು ದೂರದ ಹರಡಿಕೊಂಡಿರುವ ಇಲ್ಲಿನ ಕರಾವಳಿ ದೂರ ದೇಶದ ಪ್ರವಾಸಿಗರನ್ನು ಸೆಳೆಯುತ್ತದೆ. ಅತಿ ಹೆಚ್ಚು ಮರಳಿನಿಂದ ತುಂಬಿಕೊಂಡಿರುವ ಈ ದ್ವೀಪ ಕಳೆದ ೭ ಲಕ್ಷ ವರ್ಷಗಳಿಂದ ನಿರಂತರವಾಗಿ ವಾತಾವರಣ ಮತ್ತು ಸಮುದ್ರ ಮಟ್ಟದಲ್ಲಿ ಏರಿಳಿತಗಳನ್ನು ಕಂಡಿದೆ. ಸುಮಾರು ೩೫೦ ವಿವಿಧ ಪ್ರಬೇಧಗಳಿಗೆ ಸೇರಿದ ಪಕ್ಷಿ ಸಂಕುಲವಿದೆ. ೧೮೦೨ರಲ್ಲಿ ಯುರೋಪಿಯನ್ ಮ್ಯಾಥ್ಯೂ ಫ್ಲಿಂಡರ್‍ಸ್ ಎಂಬಾತ ಪದಾರ್ಪಣೆ ಮಾಡಿದ. ೧೮೩೬ರಲ್ಲಿ ಈ ದ್ವೀಪಕ್ಕೆ ಭೇಟಿಕೊಡುವ ಸಂದರ್ಭದಲ್ಲಿ ಸಮುದ್ರ ಮಾರುತಗಳಿಂದ ಬದುಕುಳಿದ ಕೆಲವರು ಈ ದ್ವೀಪದಲ್ಲಿ ಅಬಾರಿಜಿನಲ್ ಜನರ ಆಶ್ರಯ ಪಡೆದವರು. ಅವರಲ್ಲಿದ್ದವರ ಪೈಕಿ ಎಲಿಜಾ ಫ್ರೇಸರ್ ಎಂಬಾಕೆ ಒಬ್ಬಳು. ಆಕೆಯ ಹೆಸರನ್ನೇ ಈ ದ್ವೀಪಕ್ಕೆ ಇಡಲಾಗಿದೆ.

ಆಸ್ಟ್ರೇಲಿಯಾದ ಕ್ವೀನ್ಸ್ ಲ್ಯಾಂಡ್

ಮಳೆಕಾಡುಗಳನ್ನು ಒಳಗೊಂಡಿರುವ ಈ ನೆಲ ನಿಜಕ್ಕೂ ನಿಸರ್ಗ ರಾಣಿ ನೆಲ. ವೈವಿಧ್ಯಮ ಸಸ್ಯ, ಪಕ್ಷಿ ಹಾಗೂ ಪ್ರಾಣಿಗಳು ಇಲ್ಲಿ ಕಾಣಸಿಗುತ್ತವೆ. ಇದೇ ಈ ನೆಲದ ಶ್ರೀಮಂತಿಕೆ. ಆಸ್ಟ್ರೇಲಿಯಾದ ೪೧ ರಾಷ್ಟ್ರೀಯ ಉದ್ಯಾನಗಳ ಪೈಕಿ ಕ್ವೀನ್ಸ್‌ಲ್ಯಾಂಡ್‌ನಲ್ಲೇ ೧೯ ರಾಷ್ಟ್ರೀಯ ಉದ್ಯಾನಗಳು, ೩೧ ರಾಜ್ಯ ಮೀಸಲು ಅರಣ್ಯಗಳು ಇವೆ. ೩೪ ವಿವಿಧ ಜಾತಿಯ ಬಾವಲಿಗಳು, ೫ ಸಾವಿರ ಕೀಟಗಳು, ೪೭ ಜಾತಿ ಕಪ್ಪೆಗಳು, ೧೬೦ ವಿವಿಧ ಪ್ರಬೇಧಗಳಿಗೆ ಸೇರಿದ ಸರೀಸೃಪಗಳು, ೩೦೦ ರೀತಿಯ ಜೇಡಗಳಿಂದ ಇಲ್ಲಿನ ಕಾಡುಗಳು ತುಂಬಿವೆ.

ಸಸ್ತನಿಗಳ ಪಳೆಯುಳಿಕೆ ಪ್ರದೇಶ

ಆಸ್ಟ್ರೇಲಿಯಾದ ರಿವರ್‌ಸ್ಲೀ ಮತ್ತು ನಾರಾಕೂರ್ಟೆ ಎಂಬ ಎರಡು ನಗರಗಳ ವ್ಯಾಪ್ತಿಯಲ್ಲಿ ಈ ಪ್ರದೇಶವಿದೆ. ವಿಶ್ವದ ಹತ್ತು ಪ್ರಮುಖ ಪಳೆಯುಳಿಕೆಗಳು ದೊರೆತಿರುವ ತಾಣಗಳಲ್ಲಿ ಇದೂ ಒಂದು. ೧೧೦ ಮಿಲಿಯನ್ ವರ್ಷಗಳ ಹಿಂದೆ ಜೀವಿಸುತ್ತಿದ್ದ ಬೃಹತ್ ಗಾತ್ರದ ಸಸ್ತನಿಗಳ ಪಳೆಯುಳಿಕೆಗಳು ಇಲ್ಲಿ ಸಿಕ್ಕಿವೆ.
ಪ್ರೆ ಮೈಕೆಲ್ ಆರ್ಚರ್ ಎಂಬುವವರು ಇಲ್ಲಿನ ಬಹುಪಾಲು ಪಳೆಯುಳಿಕೆಗಳನ್ನು ಬೆಳಕಿಗೆ ತರುವಲ್ಲಿ ಪ್ರಮುಖ ಪಾತ್ರ ವಹಿಸಿದ ವ್ಯಕ್ತಿ.ಆಸ್ಟ್ರೇಲಿಯಾ ಖಂಡದಲ್ಲಿ ಜೀವ ವಿಕಾಸದ ಬಗ್ಗೆ ಈ ಪಳೆಯುಳಿಕೆಗಳು ಸಾಕಷ್ಟು ಸುಳಿವು ನೀಡಿದವು. ೧೯೯೪ರಲ್ಲಿ ಈ ಪಳೆಯುಳಿಕೆ ಪ್ರದೇಶವನ್ನು ಯುನೆಸ್ಕೊ ಪ್ರಮುಖ ಪಾರಂಪರಿಕ ತಾಣದ ಪಟ್ಟಿಗೆ ಸೇರಿಸಿತು.

ಹರ್ಡ್ -ಮ್ಯಾಕ್‌ಡೊನಾಲ್ಡ್ ದ್ವೀಪ

ಅಂಟಾರ್ಟಿಕ ಖಂಡಕ್ಕೆ ಹೊಂದಿಕೊಂಡಂತಿರುವ ಈ ದ್ವೀಪ ಸುಮಾರು ೧೭೦೦ಕಿ.ಮೀ. ವಿಸ್ತಾರವಾಗಿ ಹರಡಿಕೊಂಡಿದೆ. ಸೀಲ್ ಮತ್ತು ಪೆಂಗ್ವಿನ್ ಹಕ್ಕಿಗಳು ಹೆಚ್ಚಾಗಿ ಇಲ್ಲಿ ವಾಸಿಸುತ್ತವೆ. ವಿಶ್ವದ ಅತಿ ಸುಂದರ ತಾಣಗಳಲ್ಲಿ ಒಂದು ಎಂಬ ಹೆಗ್ಗಳಿಕೆಯೂ ಈ ದ್ವೀಪದ್ದು. ಈ ದ್ವೀಪದಲ್ಲಿರುವ ಜ್ವಾಲಾಮುಖಿಗಳು ಅತ್ಯಂತ ಕ್ರಿಯಾಶೀಲ ! ಇಂಥ ಜ್ವಾಲಾಮುಖಿಗಳಿ ಇಡೀ ಆಸ್ಟ್ರೇಲಿಯಾದ ಕಂಡುಬರುವುದಿಲ್ಲ. ಶೇ. ೮೦ರಷ್ಟು ಮಂಜಿನಿಂದ ಆವೃತ್ತವಾಗಿರುವ ಈ ಎರಡು ದ್ವೀಪಗಳು ಆಸ್ಟ್ರೇಲಿಯಾ ಪ್ರಮುಖ ಪ್ರವಾಸಿ ತಾಣವಾಗಿದ್ದು, ೧೯೯೭ರಲ್ಲಿ ಪರಂಪರಾ ತಾಣಗಳ ಪಟ್ಟಿಗೆ ಸೇರಿದವು

ಹವಳದ ಮನೆಗಳು...

ಕೀನ್ಯಾದ ಲಾಮು ಎಂಬ ಪುರಾತನ ಪಟ್ಟಣಕ್ಕೆ ಕಾಲಿಟ್ಟರೆ ನಿಮಗೆ ಅಲ್ಲಲ್ಲಿ ಹವಳ ಮತ್ತು ಬೀಟೆ ಮರದಿಂದ ಕಟ್ಟಿದ ಮನೆಗಳು ಕಾಣಸಿಗುತ್ತವೆ. ಇಲ್ಲಿನ ಮನೆಗಳೇ ಆಕರ್ಷಕ. ಸುಂದರ ಕೆತ್ತನೆಗಳಿರುವ ಕಟ್ಟಿಗೆಯಿಂದ ಕೆತ್ತಲಾದ ಮರದ ಬಾಗಿಲುಗಳು, ಸರಳವಾಗಿದ್ದೂ ಆಕರ್ಷಿಸುವ ಕೋರ್ಟ್ ಯಾರ್ಡ್ ಗಳು ಲಾಮು ಪಟ್ಟಣದ ವೈಶಿಷ್ಟ್ಯಗಳು. 19ನೇ ಶತಮಾನದಿಂದ ಇದು ಮುಸ್ಲಿಂ ಧರ್ಮದ ಹಬ್ಬ, ಉತ್ಸವಗಳ ಪ್ರಮುಖ ಕೇಂದ್ರವಾಗಿದೆ. ಇಸ್ಲಾಮ್್ ಹಾಗೂ ಸ್ವಾಹಿಲಿ ಸಂಸ್ಕೃತಿಗಳ ಅಧ್ಯಯವ ಕೇಂದ್ರವೂ ಹೌದು. ಲಾಮು ಹೆಸರಿನ ದ್ವೀಪದಲ್ಲಿರುವ ಈ ಪಟ್ಟಣ ಇತರೆ ಪಟ್ಟಣಗಳ ಪೈಕಿ ಅತಿ ದೊಡ್ಡದು. 14ನೇ ಶತಮಾನದಲ್ಲಿ ಅಸ್ತಿತ್ವಕ್ಕೆ ಬಂದ ಲಾಮು ಸ್ವಾಹಿಲಿ ವಾಸ್ತುಶೈಲಿಯನ್ನು ಬಿಂಬಿಸುವ ಸ್ಥಳಗಳಲ್ಲಿ ಪ್ರಮುಖವಾದದ್ದು. ಒಂದು ಕಾಲದಲ್ಲಿ ಗುಲಾಮರ ಮಾರಾಟ ಕೇಂದ್ರವಾಗಿತ್ತು.

ಕೀನ್ಯಾ ಪುರಾತನ ಪರ್ವತ

ಆಫ್ರಿಕ ಖಂಡದ ಎರಡನೇ ಅತಿ ಎತ್ತರದ ಪರ್ವತವಿದು. ಹಾಗೆಯೇ ಇಲ್ಲಿರುವ ಪರ್ವತಗಳ ಪೈಕಿ ಅತಿ ಹಳೆಯದು. ಕೀನ್ಯಾದ ಮೆರು ಜಿಲ್ಲೆಯ ವ್ಯಾಪ್ತಿಯಲ್ಲಿರುವ ಿದು ಒಂದು ಕಾಲದಲ್ಲಿ ಜ್ಬಾಲಾಮುಖಿ ಪರ್ವತ. ಮುಪ್ಪಾಗಿರುವಂತೆ ತಣ್ಣಗಾಗಿದೆ. ಅಷ್ಟೇ ಏಕೆ ಕುಗ್ಗಿಯೂ ಹೋಗಿದೆ. ವಿಜ್ಞಾನಿಗಳ ಪ್ರಕಾರ 2.6ಮಿಲಿಯನ್್ ವಷಱಗಳ ಹಿಂದೆ ಇದು ಸುಮಾರು 6200 ಮೀಟರ್ ಎತ್ತರವಿತ್ತಂತೆ. ಕ್ರಮೇಣ ಕಡಿಮೆಯಾಗುತ್ತಾ ಬಂದು ಈಗ ಇದರ ಎತ್ತರ 5199 ಮೀಟರ್. ಈ ಪರ್ವತ ಪ್ರದೇಶದಲ್ಲಿ ನೀರ್ಗಲ್ಲುಗಳು, ಕಣಿವೆಗಳು, ಇಳಿಜಾರು ಪ್ರದೇಶಗಳಿದ್ದು, ಆಫ್ರಿಕ ಖಂಡದ ಅತ್ಯಂತ ಪ್ರಭಾವಶಾಲಿ, ಆಕರ್ಷಕ ಪ್ರದೇಶವೂ ಆಗಿದೆ. ಪರ್ವತ ಸುತ್ತಲೂ ಸಂರಕ್ಷಿತ ಅರಣ್ಯವಿದ್ದು, 60 ವರ್ಷಗಳ ಹಿಂದೆಯೇ ಇದನ್ನು ರಾಷ್ಟ್ರೀಯ ಉದ್ಯಾನವೆಂದು ಘೋಷಿಸಲಾಗಿತ್ತು.

ಕೀನ್ಯಾ ಒಂದು ಗಣರಾಜ್ಯ. ಆಫ್ರಿಕದ ಮಡಿಲಲ್ಲಿರುವ ಇದು ಒಂದು ಕಾಲದಲ್ಲಿ ವಸಾಹತುಷಾಹಿಗಳ ತೆಕ್ಕೆಯಲ್ಲಿತ್ತು. ಉಗಾಂಡಾ, ತಾನ್ಜೇನಿಯಾ, ಇಥಿಯೋಪಿಯಾ, ಸೊಮಾಲಿಯಾ ಎಂಬ ಶತಮಾನಗಳ ಶಾಪ ಹೊತ್ತಂತಿರುವ ದೇಶಗಳಿಂದ ಸುತ್ತುವರಿದೆ ಈ ಕೀನ್ಯಾ. ಸಾವಿರಾರು ವರ್ಷಗಳ ಇತಿಹಾಸವಿರುವ ಈ ನೆಲದ ಸಂಸ್ಕೃತಿ, ಪರಂಪರೆ ಮತ್ತು ವಿಶೇಷಗಳ ಇಣುಕು ನೋಟ.....

ಬಯಲು ಪ್ರಯೋಗಾಲಯ

ಕೀನ್ಯಾದಲ್ಲಿರುವ ಟರ್ಕನಾ ರಾಷ್ಟ್ರೀಯ ಉದ್ಯಾನವನ್ನು ಹೀಗೂ ಕರೆಯಬಹುದು. ದಕ್ಷಿಣ ಆಫ್ರಿಕದ ಅತಿ ದೊಡ್ಡ ಸರೋವರವನ್ನು ಹೊಂದಿರುವ ಈ ಉದ್ಯಾನ ವಿಶಿಷ್ಟ ಸಸ್ಯ ಮತ್ತು ಪ್ರಾಣಿ ಸಮುದಾಯವನ್ನು ಹೊಂದಿದೆ. ತನ್ನೊಳಗೆ ಇನ್ನೆರಡು ರಾಷ್ಟ್ರೀಯ ಉದ್ಯಾನಗಳನ್ನು ಒಳಗೊಂಡಿರುವುದು ಮತ್ತೊಂದು ವಿಶೇಷ. ಅಂದ ಹಾಗೆ ಇಲ್ಲಿ ನೈಲ್ ಹೆಸರಿನ ಮೊಸಳೆ, ಅಪರೂಪದ ನೀರಾನೆ, ವಿವಿಧ ಜಾತಿಯ ವಿಷದ ಹಾವುಗಳು ಕಾಣಸಿಗುತ್ತವೆ. ದೂರ ದೂರದ ಪ್ರದೇಶಗಳಿಗೆ ವಲಸೆ ಹೋಗುವ ಅಸಂಖ್ಯ ಹಕ್ಕಿಗಳಿಗೆ ಇದೊಂದಿ ನಿಲುಗಡೆ ಸ್ಥಳವೂ ಹೌದು. ಉದ್ಯಾನದ ವ್ಯಾಪ್ತಿಯಲ್ಲಿರುವ ಕೂಬಿ ಫೋರಾ ಭಾಗದಲ್ಲಿ ಮೃದ್ಬಂಗಿಗಳು, ಸಸ್ತನಿಗಳ ಪಳೆಯುಳಿಕೆಯ ಗಣಿಯೇ ಇದೆ. ಹೀಗಾಗಿ ಇಲ್ಲಿ ಅಧ್ಯಯನ, ಸಂಶೋಧನೆ ನಡೆಯುತ್ತಲೇ ಇರುತ್ತವೆ. ಇದೊಂದು ಪ್ರಯೋಗಾಲಯವಾಗಿದೆ.

ಇದು ಅಪೂರ್ವ, ಅನುಪಮ...

ಸ್ಟ್ರೂವೆ ಕಮಾನು ಹಾದು ಹೋಗುವ ಹತ್ತು ರಾಷ್ಟ್ರಗಳ ಪಟ್ಟಿಯಲ್ಲಿ ಲಾಟ್ಬಿಯಾವೋ ಸೇರಿದೆ. ಬೆಲಾರಸ್್, ಈಸ್ಟೋನಿಯಾ, ಫಿನ್ಲೆಂಡ್, ಲಿಥುವೇನಿಯಾ, ನಾರ್ವೆ, ಮಾಲ್ಡೋವ ಗಣರಾಜ್ಯ, ರಷ್ಯನ್ ಒಕ್ಕೂಟ ಸ್ವೀಡನ್್ ಹಾಗೂ ಉಕ್ರೇನ್ ಇತರ ರಾಷ್ಟ್ರಗಳು. ಫ್ರೆಡ್ರಿಕ್ ಜಾರ್ಜ್ ವಿಲ್ ಹೆಲ್ಮ್ ಸ್ಟ್ರೂವೆ ಎಂಬಾತ 1816ರಿಂದ 1855ರ ಅವಧಿಯಲ್ಲಿ ನಡೆಸಿದ ಸಮೀಕ್ಷೆಯ ಕೇಂದ್ರಗಳಿವು. 2829 ಕಿ.ಮೀ. ಉದ್ದವಿರುವ ಈ ಸಮೀಕ್ಷಾ ಹಾದಿ, ಭೂಗ್ರಹದ ಆಕಾರ, ಗಾತ್ರ, ರಚನೆಯನ್ನು ಅರಿಯುವ ನಿಟ್ಟಿನಲ್ಲಿ ಇಟ್ಟ ಮಹತ್ವದ ಹೆಜ್ಜೆ. ಈ ಕಮಾನು 259 ತ್ರಿಕೋನಗಳನ್ನು 265 ಮುಖ್ಯ ಕೇಂದ್ರಬಿಂದುಗಳನ್ನು ಒಳಗೊಂಡಿದೆ. ವೈಜ್ಞಾನಿಕ ಸಾಧನೆಯೊಂದಕ್ಕೆ ವಿವಿಧ ರಾಷ್ಟ್ರಗಳ ವಿಜ್ಞಾನಿಗಳು ಮತ್ತು ಆಯಾಯಾ ಏಕಚಕ್ರಾಧಿಪತ್ಯಕ್ಕೊಳಪಟ್ಟ ರಾಷ್ಟ್ರಗಳು ಕೈಜೋಡಿಸಿದ ಅಪರೂಪದ ನಿದರ್ಶನ ಈ ಸಮೀಕ್ಷಾ ಕಾರ್ಯ. ಭೂವಿಜ್ಞಾನದ ಅಭಿವೃದ್ಧಿಯಲ್ಲಿ ಈ ಬೆಳವಣಿಗೆ ಪ್ರಮುಖ ಪಾತ್ರವಹಿಸಿದೆ ಎನ್ನುತ್ತಾರೆ ವಿಜ್ಞಾನಿಗಳು.

ರಿಗಾ ಎಂಬ ಐತಿಹಾಸಿಕ ನಗರ

ಲಾಟ್ವಿಯಾ ದೇಶದ ರಿಗಾ ನಗರ ಐತಿಹಾಸಿಕ ಕೇಂದ್ರವೆಂದು ಗುರುತಿಸಿಕೊಂಡಿದೆ. 13 ಮತ್ತು 15ನೇ ಶತಮಾನದಲ್ಲಿ ಮಧ್ಯ ಹಾಗೂ ಪೂರ್ವ ಯುರೋಪಿನ ವಾಣಿಜ್ಯ ಕೇಂದ್ರವಾಗಿತ್ತು. ಬಾಲ್ಟಿಕ್ ಸಮುದ್ರದ ಕರಾವಳಿಗೆ ಹೊಂದಿಕೊಂಡಿರುವ ಈ ನಗರ ವಿಶೇಷವಾದದ್ದು. ಬಾಲ್ಟಿಕ್ ಸಾಗರ ಪ್ರದೇಶದಲ್ಲೇ ಅತಿದೊಡ್ಡ ನಗರವಿದು. ಇಲ್ಲಿ ಡೋಮ ಕ್ಯಾಥೆಡ್ರೆಲ್ ಈ ಭಾಗದಲ್ಲಿರುವ ಅತಿದೊಡ್ಡ ಚರ್ಚ್. ಅಲ್ಲದೇ ಇಲ್ಲಿನ ಕಟ್ಟಡಗಳೂ ವಿಶೇಷ. ನವಸಂಪ್ರದಾಯ ಶೈಲಿಯ ವಾಸ್ತುಶಿಲ್ಪವನ್ನು ಅಳವಡಿಸಿಕೊಂಡಿರುವ ಈ ಕಟ್ಟಡಗಳಿಗೆ ಕಟ್ಟಿಗೆ ಬಳಸಾಗಿದ್ದು, ಅವುಗಳದ್ದೇ ವಿಶೇಷ ಮೆರುಗು. ರಿಗಾದಲ್ಲಿ ನೋಡುವುದಕ್ಕೆ ಬೇಕಾದಷ್ಟು ವಿಶೇಷಗಳಿವೆ. ವಾಸ್ತುಶಿಲ್ಪದ ಬಯಲು ಸಂಗ್ರಹಾಲಯ, ಯುದ್ಧ ವಸ್ತು ಸಂಗ್ರಹಾಲಯ, ವಿವಿಧ ದೇಶಗಳ ಕಲೆಯನ್ನು ಬಿಂಬಿಸುವ ಸಂಗ್ರಹಾಲಯಗಳಿವೆ.

ಮನುಷ್ಯ, ಪ್ರಕೃತಿಯನ್ನು ಬೆಸೆದ ನೆಲ

ಚಂಪಸಕ್ ಪ್ರಾಂತ್ಯದಲ್ಲಿರುವ ಚಂಪಸಕ್ ನಗರ ಮತ್ತು ವಾಟ್ ಹೌ ದೇವಸ್ಥಾನ ಸಂಕೀರ್ಣ ಮನುಷ್ಯ ಮತ್ತು ಪ್ರಕೃತಿಯ ನಡುವಿನ ಅವಿನಾಭಾವ ಸಂಬಂಧವನ್ನು ಸಾರುತ್ತವೆ. ಒಂದು ಸಾವಿರ ವರ್ಷಗಳಷ್ಟು ಪುರಾತನವಾದ ವಾಟ್ ಹೌ ದೇವಸ್ಥಾನ ಇಂದಿಗೂ ಸುರಕ್ಷಿತವಾಗಿವೆ. ಪರ್ವತಗಳ ಸಾಲನ್ನೇ ಬಳಸಿಕೊಂಡು, ಸುಮಾರು ಹತ್ತು ಕಿ.ಮೀ.ನಷ್ಟು ಉದ್ದಕ್ಕೆ ಗುಹೆ, ಧರ್ಮಪೀಠಗಳು, ದೇವಸ್ಥಾನಗಳು ನಿರ್ಮಾಣವಾಗಿವೆ. ಈ ಭಾಗದಲ್ಲೇ ಹರಿಯುವ ಮೆಕಾಂಗ್ ನದಿಯ ದಡದಲ್ಲಿ ಎರಡು ನಗರಗಳು ಸುವ್ಯವಸ್ಥಿತವಾಗಿ ಹಾಗೂ ಸುಯೋಜಿತವಾಗಿ ನಿರ್ಮಾಣವಾಗಿವೆ. ಖಾಮರ್ ಸಾಮ್ರಾಜ್ಯದ ಅವಧಿಯಲ್ಲಿ ಪ್ರಮುಖವಾಗಿ ಅಭಿವೃದ್ಧಿ ಕಂಡಿತು. ಕ್ರಿಸ್ತಶಕ 5ನೇ ಶತಮಾನದಿಂದ 15ನೇ ಶತಮಾನಗಳ ಅವಧಿಯಲ್ಲಿ ಕಂಡ ಬೆಳವಣಿಗೆಗಳನ್ನು ಕಾಣುತ್ತಾ ಬಂದಿದೆ.

ದೊರೆಗಳ ಊರು

ಲುಮಾಂಗ್ ಪ್ರಬಾಂಗ್ ಲಾವೋ ಸಾಮ್ರಾಜ್ಯದ ರಾಜಧಾನಿಯಾಗಿದ್ದ ಈ ನಗರದಲ್ಲಿ ಸಾಂಪ್ರದಾಯಿಕ ಹಾಗೂ ಆಧುನಿಕ ವಾಸ್ತುಶೈಲಿಯ ಸಂಯೋಜನೆಯನ್ನು ಕಾಣಬಹುದು. 19 ಮತ್ತು 20ನೇ ಶತಮಾನದಲ್ಲಿ ಈ ಭಾಗದಲ್ಲಿ ಅಸ್ತಿತ್ವದಲ್ಲಲಿದ್ದ ಯುರೋಪಿಯನ್ ವಸಾಹತುಶಾಹಿ ಅವಧಿಯಲ್ಲಿ ಎರಡು ಭಿನ್ನ ಸಂಸ್ಕೃತಿ ಮತ್ತು ಸಂಪ್ರದಾಯಗಳ ಸಮ್ಮಿಲನವಾಗಿದ್ದು. ಅದು ಇಲ್ಲಿನ ವಾಸ್ತುಶೈಲಿಯಲ್ಲಿ ಎದ್ದು ಕಾಣುತ್ತದೆ. ಮುವಾಂಗ್ ಸೂ ಎಂಬುದು ಇದರ ಹಳೆಯ ಹೆಸರು. ಕ್ರಿಸ್ತಶಕ 698ರಲ್ಲಿ ಥೈ ದೊರೆ ಖುನ್ ಲೋನಿಂದ ಆಕ್ರಮಣಕ್ಕೊಳಗಾಗಿ ಸಾಮ್ರಾಜ್ಯವೊಂದು ಇಲ್ಲಿ ಸ್ಥಾಪನೆಯಾಯಿತು. ಹೀಗೆ ನೂರಾರು ದೊರೆಗಳನ್ನು ಕಂಡು ಪ್ರಬಾಂಗ್ ಒಂದು ಐತಿಹಾಸಿಕ ನಗರವಾಗಿಯೂ ಬೆಳೆಯಿತು.

ಬಂದರುಗಳ ಊರು ಟೈರ್

ಟೈರ್ ಹೆಸರಿನ ಈ ಸ್ಥಳ ಲೆಬನಾನ್ ರಾಷ್ಟ್ರದ ನಾಲ್ಕನೇ ಅತಿ ದೊಡ್ಡ ನಗರ. ಈ ದೇಶದ ಪ್ರಮುಖ ಬಂದುಗಳು ಇಲ್ಲೇ ಇವೆ. ಪ್ರಮುಖ ಪ್ರವಾಸಿ ತಾಣವೂ ಹೌದು. ನಗರಕ್ಕೆ ಎರಡು ಕೇಂದ್ರಗಳಿದ್ದು, ಒಂದು ನಗರದ ವ್ಯಾಪ್ತಯಲ್ಲಿರುವ ದ್ಬೀಪದಲ್ಲಿದ್ದರೆ, ಇನ್ನೊಂದು ಕರಾವಳಿ ಭಾಗದಲ್ಲಿದೆ. ಹೆರೋಡೆಟಸ್ ಉಲ್ಲೇಖಿಸಿರುವಂತೆ ಈ ನಗರ ಕ್ರಿಸ್ತಪೂರ್ವ 2700ರಲ್ಲೇ ಸ್ಥಾಪನೆಯಾಗಿದೆ. ಕ್ರಿಸ್ತಪೂರ್ವ 1300ರ ಅವಧಿಗೆ ಸೇರಿದ ಅನೇಕ ಸ್ಮಾರಕಗಳು ಇಲ್ಲಿವೆ. ಕ್ರಿಸ್ತಪೂರ್ವ 1000ರ ವೇಳೆಯಲ್ಲಿ ಇಲ್ಲಿ ಉತ್ರತ್ತಿ ಮಾಡಲಾದ ನೇರಳೆ ಬಣ್ಣ " ಟೈರಿಯನ್ ಪರ್ಪಲ್' ಹೆಸರಿನಲ್ಲಿ ಜನಪ್ರಿಯವಾಗಿ ಬೇರೆ ಬೇರೆ ಸಂಸ್ಕೃತಿಗಳಲ್ಲಿ ಸ್ಥಾನ ಪಡೆದುಕೊಂಡಿತು.

ವಿಶ್ವದ ಅತಿ ಪುರಾತನ ಆವಾಸ ಸ್ಥಾನ

ಲೆಬನಾನ್ ದೇಶದ ಬೈಬ್ಲೋಸ್ ವಿಶೇಷತೆಗಳ ಸ್ಥಳ. ನವಶಿಲಾಯುಗದ ಮಾನವರ ವಾಸಸ್ಥಾನವಾಗಿದ್ದ ಈ ಸ್ಥಳ ನಾಗರಿಕತೆಗಳನ್ನೂ ಕಂಡ ಪುರಾತನ ನಗರ. ಗ್ರೀಕರು ಇದನ್ನು ಗುಬ್ಲಾ ಎನ್ನುತ್ತಿದ್ದರು. ಫೀನಿಷ್ ಇತಿಹಾಸಕಾರ ಸಾನ್ ಖುನಿಯಾಥನ್ ಪ್ರಕಾರ ಟ್ರೋಜನ್ ಯುದ್ಧ ಪೂರ್ವದಲ್ಲೇ ನಿರ್ಮಾಣವಾದ ಮೊದಲ ನಗರವಿದು. ನಿರಂತರ ಆವಾಸ ಸ್ಥಾನವಾಗಿರುವ ವಿಶ್ವದ ಪ್ರಾಚೀನ ತಾಣ. ಕ್ರಿಸ್ತಪೂರ್ವ 5000 ವರ್ಷಗಳ ಹಿಂದೆ ನಿರ್ಮಾಣವಾದ ಕಟ್ಟಡಗಳು 1920ರಲ್ಲಿ ನಂತರ ನಡೆದ ಉತ್ಖನನಗಳಿಂದ ಬಯಲಿಗೆ ಬಂದಿವೆ ತೋತ್ ಎಂಬಾತ ಬರವಣಿಗೆಯನ್ನು ಕಂಡುಕೊಂಡಿದ್ದು ಇದೇ ನೆಲದಲ್ಲಿ ಎನ್ನಲಾಗಿದೆ. ರೋಮನ್ನರು, ಫೀನಿಷಿಯನ್ನರು, ಪರ್ಷಿಯನ್ನರ ಕಾಲದಲ್ಲಿ ಸುತ್ತಲ ರಾಷ್ಟ್ರಗಳೊಂದಿಗೆ ಸ್ನೇಹ ಸಂಬಂಧ ಬೆಳೆಸಿಕೊಂಡು ಸದಾ ಅಭಿವೃದ್ಧಿ ಕಂಡ ನಗರವಿದು.

ಬೆಕಾ ಕಣಿವೆಯ ದೇವರು"ಬಾಲ್ಬೇಕಾ"

ಲೆಬನಾನ್ ಬಾಲ್ಬೇಕಾ ಫಿನಿಷಿಯನ್ ನಗರ. ರೋಮನ್ ವಾಸ್ತುಶೈಲಿಯನ್ನು ಬಿಂಬಿಸುವ ಅನೇಕ ಪುರಾತನ ಕಟ್ಟಡಗಳ ಅವಶೇಷಗಳು ಇಲ್ಲಿ ಕಾಣಸಿಗುತ್ತವೆ. ಧಾರ್ಮಿಕವಾಗಿ ಹೆಚ್ಚು ಗುರುತಿಸಿಕೊಂಡಿರುವ ಬಾಲ್ಬೇಕಾ ಸಾವಿರಾರು ಪ್ರವಾಸಿಗರನ್ನು ಆಕರ್ಷಿಸುವ ಸ್ಥಳ. ಹೆಲಿಪೊಟಿನ್ ಜುಪಿಟರ್ ಬಾಲ್ ಪ್ರಮುಖ ತೀರ್ಥ ಕ್ಷೇತ್ರ. 1898ರಲ್ಲಿ ಇಲ್ಲಿ ಜರ್ಮನಿಯ ಪ್ರಾಚ್ಯವಸ್ತುಸಂಶೋಧಾನ ತಂಡಗಳು ಇಲ್ಲಿ ಉತ್ಖನನ ಆರಂಭಿಸಿದವು. ಈ ತಂಡಗಳಿಗೆ ಬಕಾಸ್ ದೇವಸ್ಥಾನ ಸೇರಿದಂತೆ ಹತ್ತಾರು ಪ್ರಾಚೀನ ಬೃಹತ್ ನಿರ್ಮಾಣಗಳು ದೊರೆತವು. ಸಿರಿಯನ್ ಹಾಗೂ ಈಜಿಪ್ತ್ ದಾಖಲೆ ಪ್ರಕಾರ ಬಾಲ್ಬೇಕಾ ವಾಣಿಜ್ಯ ಕ್ಷೇತ್ರದಲ್ಲಿ ಮಹತ್ವ ಗಳಿಸಿಕೊಂಡಿದ್ದ ನಗರ.

ಬೆಕಾ ಕಣಿವೆಯ ಅಂಜೂರ

ಲೆಬನಾನ್ ದೇಶದ ಝಾಹ್ಲೆ ಜಿಲ್ಲೆಯ ಅಂಜಾರ್ ( ಇದೇ ಹೆಸರಿನ ಊರು ಭಾರತದ ಗುಜರಾತ್ ನಲ್ಲೂ ಇದೆ) ನಗರ ಅಂಜೂರದಂತೆ ಚಿಕ್ಕದಾಗಿದೆ. 12 ಶತಮಾನಗಳ ಇತಿಹಾಸವಿರುವ ಈ ನಗರ ಅಲ್ಲಲ್ಲಿ ಹಾಳು ಬಿದ್ದಂತಿದೆ. ಹಾಗೆ ಹಾಳು ಬಿದ್ದಂತೆ ಕಾಣುವ ಪ್ರದೇಶವಿದೆಯಲ್ಲ, ಅದು ಕ್ರಿಸ್ತಶಕ 8-9ನೇ ಶತಮಾನದಲ್ಲಿ ಕಟ್ಟಿದ ಅರಮನೆ ಮತ್ತಿತರ ಕಟ್ಟಡಗಳ ಅವಶೇಷ. ಒಂದನೇ ಕಾಲಿಫ್ ವಾಲಿದ್ ನಿಂದ ನಿರ್ಮಾಣಗೊಂಡ ಅಂಜಾರ್ ನಗರ ಸಿರಿಯನ್ ಸೇನೆಯ ನೆಲೆಯಾಗಿತ್ತು. ಸಂಪೂರ್ಣ ನಿರ್ಲಕ್ಷಿಸಲ್ಪಟ್ಟಿತ್ತು. ಕಾಲಾನಂತರ ಮರು ಜೀವ ಪಡೆದುಕೊಂಡ ನಗರ 8500 ಮಂದಿಗೆ ನೆಲೆ ನೀಡಿದೆ. ಬೇಸಿಗೆಯಲ್ಲಿ ಇಲ್ಲಿನ ಜನ ಸಂಖ್ಯೆ 13 ಸಾವಿರಕ್ಕೆ ಹೆಚ್ಚುತ್ತದೆ. ಕಾರಣ ಬೇರೆ ಬೇರೆ ಭಾಗಗಳಲ್ಲಿ ವಾಸಿಸುವ ಊರಿನ ಜನ, ಅವರ ಬಂಧು ಬಾಂಧವರು ಬೇಸಿಗೆಗೆ ಇಲ್ಲಿಗೆ ಬರುತ್ತಾರೆ.